കൊടകര : ശാപമോക്ഷമില്ലാതെ പേരാമ്പ്ര ആയുര്‍വേദാശുപത്രി റോഡ്. തൃശൂര്‍ ജില്ലയിലെ പഞ്ചകര്‍മചികിത്സയുള്ള അപൂര്‍വം ആശുപത്രികളിലൊന്നായ കൊടകര പേരാമ്പ്ര സര്‍ക്കാര്‍ ആയുര്‍വേദാശുപത്രിയിലേക്കുള്ള റോഡാണ് മോക്ഷം കാത്തു കിടക്കുന്നത്.
നിത്യേന സംസ്ഥാനത്തിന്റെ വിവിധഭാഗങ്ങളില്‍നിന്നായി നൂറുകണക്കിന് രോഗികള്‍ എത്തുന്ന ആയുര്‍വേദ ആരോഗ്യകേന്ദ്രത്തിലേക്കുള്ള പാതയാണിത്. കുറച്ചുദൂരം മാത്രമുള്ള ഈ റോഡിന്റെ നിര്‍മാണം 2019 ജനുവരിയില്‍ പണിപൂര്‍ത്തിയാക്കാന്‍ നിര്‍ദേശമുണ്ടായെങ്കിലും കരാറുകാരന്‍ പണി പൂര്‍ത്തിയാക്കിയിരുന്നില്ല.
റോഡിന്റെ രണ്ടുവശത്തും കാനകെട്ടലും റോഡിലെ ഒരു കലുങ്കുമാണ് പണിഞ്ഞത്. മഴപെയ്താല്‍ ആശുപത്രിക്കുമുന്‍വശത്തെ റോഡില്‍ വെള്ളക്കെട്ടാണ്.എത്രയും പെട്ടെന്ന് ഈ റോഡിന്റെ നിര്‍മാണം പൂര്‍ത്തീകരിക്കണമെന്നാണ് നാട്ടുകാരുടെ ആവശ്യം.
