മറ്റത്തൂര് : മറ്റത്തൂര് പഞ്ചായത്തിലെ മലയോരഗ്രാമമായ പോത്തന്ചിറയില് വീണ്ടും കാട്ടാനയിറങ്ങി. ഇവിടെയുള്ള ചെരണക്കല് പോളിന്റെ കൃഷിയിടത്തിലെ കാര്ഷിക വിളകളാണ് കഴിഞ്ഞ രാത്രി കാട്ടാന നശിപ്പിച്ചത്. കഴിഞ്ഞ രണ്ടാഴ്ചക്കിടെ ഇത് മൂന്നാം തവണയാണ് ഈ പ്രദേശത്ത് കാട്ടാനയിറങ്ങി കൃഷി നശിപ്പിക്കുന്നത്.ജാതി, വാഴ,തെങ്ങ്, അടക്കാമരം തുടങ്ങിയ വിളകളാണ് ആന നശിപ്പിച്ചത്. ഏതാനും ദിവസം മുമ്പ് ഈ പ്രദേശത്തെ ഐപ്പന് പറമ്പില് മറിയാമ്മയുടെ പറമ്പിലെ കാര്ഷിക വിളകളും കാട്ടാന നശിപ്പിച്ചിരുന്നു.
മറ്റത്തൂര് പഞ്ചായത്തിലെ വിവിധപ്രദേശങ്ങളില് ഏതാണ്ട് ഒരു മാസത്തോളമായി കാട്ടാനകളുടെ ശല്യം രൂക്ഷമാണ്. മുരിക്കുങ്ങല് -മുപ്ലി റോഡിലൂടെ ബൈക്കില് പോയിരുന്ന യുവാവിന് കഴിഞ്ഞദിവസം കാട്ടാനയുടെ ആക്രമണത്തില് പരിക്കേറ്റിരുന്നു. മാള പുത്തന്ചിറ കളിക്കവീട്ടില് ഫിറോസിനെയാണ് ആന ആക്രമിച്ചത്. ുഇയാള് കൊടകരയിലെ സ്വകാര്യആശുപത്രിയില് ചികിത്സയിലായിരുന്നു. മുപ്ലി,താളുപ്പാടം പ്രദേശത്തും കാട്ടാനകളുടെ ശല്യം രൂക്ഷമാണ്. കാട്ടാനകളുടെ ശല്യംമൂലം ഈ മേഖലയിലെ കര്ഷകര് ഏറെ ദുരിതത്തിലാണ്.