പേരിലെ ഐതിഹ്യം
അയ്യന്‍ ചിരികണ്ടന്‍ എന്ന സാമന്തരാജവിന്റെ കീഴിലായിരുന്നതും ഇന്നു മുകുന്ദപുരം താലൂക്ക് എന്നറിയപ്പെടുന്നതുമായ ഭൂപ്രദേശത്തെ ഒരു ഭാഗമാണ് കൊടകര ഗ്രാമപഞ്ചായത്ത്. പന്തല്ലൂര്‍ പള്ളത്ത് മഠത്തില്‍ കര്‍ത്താക്കന്മാരുടെ കൈവശമായിരുന്നു ഈ പ്രദേശം. കോടശ്ശേരി കര്‍ത്താക്കന്മാര്‍ ബലം പ്രയോഗിച്ചും അല്ലാതേയും പന്തല്ലൂര്‍ മഠത്തില്‍ കര്‍ത്താക്കന്മാരുടെ ഒട്ടേറെ ഭൂമി കൈവശപ്പെടുത്തി. എന്തൊക്കെ സമ്മര്‍ദ്ദങ്ങള്‍ ഉണ്ടായിട്ടും പന്തല്ലൂര്‍ പള്ളത്ത് മഠത്തില്‍ കര്‍ത്താക്കന്മാര്‍ കോടശ്ശേരി കര്‍ത്താക്കന്മാര്‍ക്ക് കൊടുക്കാതെ കൈവശം വച്ച ഈ കരയെ ‘കൊടുക്കാത്ത കര’ എന്നു വിളിച്ചുവന്നു. ഇത് പിന്നിട് ‘കൊടകര’ എന്നറിയപ്പെട്ടു എന്നതാണ് ഏറ്റവും പ്രബലമായ ചരിത്രം. ഇതു കൂടാതെ മറ്റൊന്നുകൂടി കേട്ടുവരുന്നു. ഈ കരയ്ക്കുചുറ്റും കുടയിലെ ആറു കമ്പികൾ പോലെ മറ്റത്തൂർ, പറപ്പൂക്കര, മുരിയാട്, ആളൂർ, പോട്ട, നെല്ല്ലായി എന്നിങ്ങനെ ആറ് ഗ്രാമങ്ങൾ സ്ഥിതി ചെയ്യുന്നു. ഇവയുടെ കേന്ദ്രമായി വർത്തിച്ചിരുന്നത് കൊണ്ടാവാം ഈ പേർ വന്നതെന്നും പറയപ്പെടുന്നു.
കൊടകര ഷഷ്‌ഠിപ്പെരുമ
കേരളത്തിലെ ഷഷ്‌ഠിയാഘോഷങ്ങളുടെ പൈത്യകം കൊടകരയ്ക്ക് അവകാശപ്പെട്ടതാണ്. കുന്നത്യക്കോവില്‍ ശ്രീ സുബ്രമഹ്ണ്യ ക്ഷേത്രത്തില്‍ നടക്കുന്ന ഷഷ്‌ഠിയാണ് കേരളത്തിലെ ഏറ്റവും ആദ്യത്തെ ഷഷ്‌ഠി മഹോത്സവം എന്നു കരുതുന്നു.ആറാട്ടുപുഴ പൂരത്തില്‍ പങ്കെടുത്തു മടങ്ങുന്ന പൂനിലാര്‍ക്കാവ് ഭഗവതിയും പിഷാരിക്കല്‍ ഭഗവതിയും കൂടി ആ ദിവസം മുഴുവനും കുന്നത്യക്കോവില്‍ ശിവക്ഷേത്രത്തില്‍ ചിലവഴിച്ചു മടങ്ങുന്ന പതിവുണ്ട്. ശിവക്ഷേത്രത്തിനു താഴെ സ്ഥിതി ചെയ്യുന്ന വിഷ്ണുക്ഷേത്രത്തില്‍ ചിങ്ങമാസത്തിലെ അഷ്‌ടമിരോഹിണിയും വ്യശ്ചികമാസത്തിലെ ദ്വാദശിയും വിശേഷദിവസങ്ങളാണ്. ക്ഷേത്രമതിലകത്ത് പരശുരാമന്‍ കിടക്കാന്‍ ഉപയോഗിച്ച ഒറ്റപ്പാളി കല്ലും, തലയ്‌ക്കു വച്ചിരുന്നഉരുളന്‍ കല്ലും ഇന്നുമുണ്ട്.
സമകാലീന വിദ്യഭ്യാസ, വ്യവസായ, രാഷ്ട്രീയ ചരിത്രം
ഇരുപതാം നൂറ്റാണ്ടിന്റെ ആദ്യ ദശകത്തിൽ ആരംഭിച്ച ലോവർ പ്രൈമറി സ്ക്കൂളാണ് ഔപചാരിക വിദ്യഭ്യാസ രംഗത്തെകൊടകരയുടെ ആദ്യത്തെ കാൽ വെയ്പ്പ്. പടിഞ്ഞാറെ കുന്നത്ത് മൂസ്സ് നമ്പൂതിരിയുടെ നേത്യത്വത്തിൽ നാട്ടുകാരുടെ ശ്രമഫലമായി 1908 ൽ ആരംഭിച്ച ആ വിദ്യാലയമാണ് ഇന്ന് കൊടകരയുടെ ഹ്യദയഭാഗത്ത് സ്ഥിതി ചെയ്യുന്ന ഗവ. എൽ.പിസ്ക്കൂൾ.
ഇന്നു ഇരിഞ്ഞാലക്കുട രൂപത കോർപ്പറേറ്റ് മാനേജ് മെന്റിന്റെ കീഴിൽ പ്രവർത്തിക്കുന്ന പേരാമ്പ്ര സെന്റ് ആന്റണീസ് എൽ.പി. സ്ക്കൂൾ തുടങ്ങിയത് 1924 ലാണ് . തേശ്ശേരിയിലും ഒരു എൽ.പി സ്ക്കൂൾ ആരംഭിക്കുകയും കാലക്രമേണെ അത് യു.പിആക്കി ഉയർത്തുകയും ചെയ്തു. ഈ സ്കൂളിന്റെ പ്രഥമ ഹെഡ് മാസ്റ്ററായിരുന്നത് സാമൂഹ്യ സേവനരംഗത്തും ദേശീയ പ്രസ്ഥാനവുമായി ബന്ധപ്പെട്ടും പ്രവർത്തിച്ച് വ്യക്തിമുദ്ര പതിപ്പിച്ച വൈലോപ്പിള്ളി സുബ്രമഹ്ണ്യൻ മാസ്റ്ററായിരുന്നു. 1948 ൽ മനക്കുളങ്ങര കെ.വി.യു.പി. സ്ക്കൂൾ ആരംഭിച്ചു. സ്വകാര്യ വ്യക്തികളുടേയും കുടുംബങ്ങളുടേയും ശ്രമഫലമായാണ് ഈ രണ്ടു സ്കൂളുകൾ ആരംഭിച്ചത്.
1948 ലാൺ കൊടകര ഡോൺബോസ്കോ എൽ.പി.സ്കൂൾ പ്രവർത്തനം ആരംഭിച്ചത്. സെന്റ് സേവിയേഴ്സ് അനാഥാലയത്തിന്റെ ചുമതലക്കാരനായെത്തിയ വൈന്തല സ്വദേശി വലിയ വീട്ടിൽ കുര്യാക്കോസ് മാസ്റ്ററുടെ ശ്രമങ്ങളാണ് ഈ സ്കൂൾ അനുവദിച്ചു കിട്ടുന്നതിനിടയാക്കിയത്. ഈ വിദ്യാലയം 1966 ൽ യു.പി ആയും 1982 ൽ ഹൈസ്ക്കൂളായും ഉയർന്നു. പുലിപ്പാറകുന്നിൽ ജി.ഡബ്ള്യു.എൽ.പി സ്ക്കൂളിന്റെ പ്രവർത്തനം ആരംഭിച്ചത് 1967 ലാൺ. ശ്രീ. കണ്ടന്മാസ്റ്ററുടെ നേത്വത്തത്തിലാണ് ഇവിടത്തെ സ്ക്കൂൾ പ്രവർത്തനം തുടങ്ങിയത്. കൊടകരയിൽ ഒരു ഹൈസ്കൂൾ സ്ഥാപിച്ചത് 1944 ലാണ് . എട്ട്, ഒൻപത്, പത്ത് ക്ലാസ്സുകൾ ഒരേ വർഷം തന്നെ ആരംഭിച്ചു.ശ്രീ. എ. ക്യഷ്ണവാരിയർ ആയിരുന്നു ആദ്യത്തെ ഹെഡ് മാസ്റ്റർ. വരന്തരപ്പിള്ളി, മുപ്ളിയം, ചെങ്ങാലൂർ, വെള്ളിക്കുളങ്ങര, പോട്ട, കനകമല, ആനന്ദപുരം, മുരിയാട് തുടങ്ങി വിദൂര ഗ്രാമങ്ങളിൽ നിന്നുള്ള വിദ്യാർത്ഥികൾക്കുപോലും ഈ വിദ്യാലയം അനുഗ്രഹമായി. സ്ഥാപക മാനേജരായിരുന്ന അരിക്കാട്ട് വേലായുധ മേനോന്റെ മരണശേഷം 1947 ൽ ഒരു പത്തംഗസമിതിയും പിന്നീട് നായർ സമുദായവും നായർ സമാജവും സ്കൂൾ എറ്റെടുത്തു നടത്തി. 1950 ൽ സ്ക്കൂളിന്റെ നടത്തിപ്പ് അദ്ധ്യാപകസംഘടനക്കായി. സർക്കാർ ഈ സ്കൂൾ എറ്റെടുത്തത് 1958 ജുൺ രണ്ടിനാണ് .
1947 ലെ എസ്.എസ്.എൽ.എസി. പരീക്ഷയിൽ 48-ൽ 45 പേരും വിജയിച്ച് കൊച്ചി സംസ്ഥാനത്തെ പ്രഥമ സ്ഥാനംനേടാൻ ഈ സ്കൂളിനു കഴിഞ്ഞു. പിൽ ക്കാലത്ത് മലയാള സാഹിത്യ നഭോമണ്ഡലത്തിൽ ഉദിച്ചുയർന്ന സർവ്വശ്രീ.എൻ.വി.ക്യഷ്ണവാര്യർ, കെ.എസ്. മേനോൻ, പി.ജി.പി പിള്ള എന്നിവരുടെ സേവനം ഈ സ്കൂളിനു ലഭ്യമായതും ഈ കാലഘട്ടത്തിലാണ് . 1960 കളിൽ ഓരോ ക്ലാസ്സിനും പതിനഞ്ച് ഡിവിഷനുകളോളം ഉണ്ടാകുകയും സ്ഥലപരിമിതി മൂലം ഷിഫ്ട് സമ്പ്രദായം എർപ്പെടുത്തേണ്ടിവരികയുമുണ്ടായി.
1967 ൽ ആൺകുട്ടികൾക്കും പെൺകുട്ടികൾക്കും വെവ്വേറെ സ്കൂൾ നിലവിൽ വന്നു. അപ്പോൾ എൽ.പി. ബോയ്സും എൽ.പി ഗേൾസും ചേർന്ന് ഇന്നത്തെ എൽ.പി കെട്ടിടത്തിൽ – എൽ.പി. ഗേൾസ് കെട്ടിടം ഇപ്പോഴത്തെ ഗേൾസ് ഹൈസ്ക്കൂളായും ജി.എൻ.എച്ച്. എസ് ഇപ്പോഴത്തെ ബോയ്സ് സ്ക്കൂളായും മാറി. ഈ അടുത്ത അവസരത്തിലാണ് +2 സ്ക്കൂൾ ഗേൾസ് ഹൈസ്ക്കൂളിനോട് ചേർത്തത്.
കൊടകരയിൽ 1950 കൾക്ക്മുമ്പ് വ്യവസായിക മുന്നേറ്റത്തിനുള്ള ശ്രമങ്ങൾ ആരംഭിച്ചിരുന്നു. ഇതിന്റെ വ്യക്തമായ തെളിവായിരുന്നു കൊടകരയിലെ ഗ്രാമോദ്ധാരണം. ഇതിൽ 20 തറികളുള്ള ഒരു നെയ്ത്ത് കേന്ദ്രം ഉണ്ടായിരുന്നു. ഇതിനെ ചുറ്റിപ്പറ്റി നിരവധി നൂൽനൂല്പു കേന്ദ്രങ്ങളും ഒരു തുണി വിപണന കേന്ദ്രവും പ്രവർത്തിച്ചിരുന്നു. കൊടകരയിൽ ഒരു തുണിമിൽ സ്ഥാപിക്കുന്നതിനുവേണ്ടിവന്ന അളഗപ്പ ചെട്ടിയാർ ഇവിടെ സ്ഥലം ലഭിക്കാതിരുന്നതുകൊണ്ട് ആമ്പല്ലൂരിൽ കമ്പനി സ്ഥാപിച്ചു എന്നും പറയപ്പെടുന്നു. ആദ്യകാല വ്യവസായങ്ങളായി കൊടകരയിലുണ്ടായിരുന്നത് ഒരു റൈസ് മില്ലും ഒരു തീപ്പെട്ടി കമ്പനിയും ഓട്ടുകമ്പനിയുമാൺ. ഇതിൽ ഓട്ടു കമ്പനി ഇപ്പോഴും നന്നായി പ്രവർത്തിക്കുന്നുണ്ട്.
പഴയ കൊച്ചി രാജ്യത്തിന്റെ ഭാഗമായിട്ടാണ് കൊടകര കേരള രാഷ്ട്രീയ ചരിത്രത്തിൽ സ്ഥാനം പിടിക്കുന്നത്. 1956 ലാണ് ഐക്യകേരളം നിലവിൽ വന്നത്. കേരളപ്പിറവിക്ക് ശേഷം ചാലക്കുടി-ആമ്പല്ലൂര്‍ ദ്വയാംഗ മണ്ഡലത്തില്‍ ഉള്‍പ്പെട്ടിരുന്ന കൊടകര 1960ലാണ് സ്വതന്ത്ര മണ്ഡലമായി മാറിയത്. ആ വര്‍ഷം കോണ്‍ഗ്രസിലെ ടി.പി.സീതാംബരന്‍ ഇവിടെനിന്നും വിജയിച്ചു. ’67ല്‍ നടന്ന നിയമസഭാ തെരഞ്ഞെടുപ്പില്‍ സി.പി.ഐയിലെ പി.എസ്.നമ്പൂതിരി കൊടകരയെ പ്രതിനിധാനം ചെയ്തു. ’70 മുതല്‍ ’77 വരെ മുഖ്യമന്ത്രിയായിരുന്ന സി.അച്യുതമേനോന്‍ കൊടകരയില്‍ നിന്നാണ് തെരഞ്ഞെടുക്കപ്പെട്ടത്. ’77ലും ’80ലും കേരള കോണ്‍ഗ്രസ് -എമ്മിലെ ലോനപ്പന്‍ നമ്പാടനായിരുന്നു എം.എല്‍.എ. ’82 തെരഞ്ഞെടുപ്പില്‍ കോണ്‍ഗ്രസ് -എസിലെ സി.ജി.ജനാര്‍ദനന്‍ വിജയിച്ചു. ’87ലും ’91ലും ’96ലും 2001ലും നടന്ന തെരഞ്ഞെടുപ്പുകളില്‍ കോണ്‍ഗ്രസിലെ കെ.പി.വിശ്വനാഥന് തുടര്‍ച്ചയായി വിജയിച്ചു. എന്നാല്‍, 2006ല്‍ നടന്ന തെരഞ്ഞെടുപ്പില്‍ സി.പി.എമ്മിലെ പ്രഫ.സി.രവീന്ദ്രനാഥിനോട് 19,820 വോട്ടുകള്‍ക്ക് കെ.പി.വിശ്വനാഥന് അടിയറവ് പറയേണ്ടിവന്നു.
പഴയ കൊടകര മണ്ഡലത്തില്‍ കൊടകര, മറ്റത്തൂര്‍, വരന്തരപ്പിള്ളി, തൃക്കൂര്‍, നെന്മണിക്കര, അളഗപ്പ നഗര്‍, പുതുക്കാട് എന്നിങ്ങനെ ഏഴ് പഞ്ചായത്തുകളാണുണ്ടായിരുന്നത്. ഇതില്‍ കൊടകര പഞ്ചായത്ത് ഇപ്പോള്‍ ചാലക്കുടി മണ്ഡലത്തിന്റെ ഭാഗമായി. 2011 മെയ് മാസത്തിൽ നടന്ന തിരഞ്ഞെടുപ്പിൽ ചാലക്കുടി മണ്ഡലത്തിൽ നിന്നും വിജയിച്ച ബി.ഡി.ദേവസ്സിയാണ് ഇപ്പോൾ കൊടകരയുടെ എം.എൽ.എ. കൊടകര പ്രതിനിധികള്‍ നാലുതവണ സംസ്ഥാന മന്ത്രിസഭയില്‍ അംഗങ്ങളായി. 1970 ഒക്‌ടോബര്‍ മുതല്‍ ’77 മാര്‍ച്ച് 22 വരെ മുഖ്യമന്ത്രിയായ സി.അച്യുതമേനോന്‍, 1980 ജനുവരി 25 മുതല്‍ ’81 ഒക്‌ടോബര്‍ 20 വരെ ഗതാഗതമന്ത്രിയായ ലോനപ്പന്‍ നമ്പാടന്‍, ’91 ജൂലൈ രണ്ട് മുതല്‍ ’94 നവംബര്‍ 16 വരെയും 2004 സെപ്റ്റംബര്‍ അഞ്ച് മുതല്‍ 2005 ഫെബ്രുവരി 10 വരെയും വനംമന്ത്രിയായ കെ.പി.വിശ്വനാഥന് എന്നിവരാണ് കൊടകരക്ക് മന്ത്രിസഭയില്‍ പ്രാതിനിധ്യം നേടിത്തന്നവര്‍. ചരിത്രത്തിലേക്ക് മറഞ്ഞ കൊടകരയുടെ അവസാനത്തെ എം.എല്‍.എ പദവി പ്രഫ.സി.രവീന്ദ്രനാഥിന് സ്വന്തം.
സ്ഥാപനങ്ങള്‍
മൃഗസംരക്ഷണത്തിനായി മൃഗസംരക്ഷണ വകുപ്പിനുകീഴില്‍ പ്രവര്‍ത്തിക്കുന്ന ഒരു മൃഗാശുപത്രി കൊടകരയില്‍ പ്രവര്‍ത്തിച്ചുവരുന്നു. പന്നി, കോഴി, മുയല്‍, മുട്ടക്കോഴി, പശു എന്നിവയുടെ പരിപാലനകേന്ദ്രങ്ങള്‍ പഞ്ചായത്തില്‍ നിലവിലുണ്ട്. ദേശസാല്‍കൃത ബാങ്കായ സെന്‍ട്രല്‍ ബാങ്ക് ഓഫ് ഇന്ത്യയുടെ ഒരു ശാഖ പഞ്ചായത്തില്‍ സ്ഥിതി ചെയ്യുന്നു. തൃശ്ശൂര്‍ ജില്ലാ സഹകരണ ബാങ്ക്, ടീച്ചേഴ്സ് സഹകരണ ബാങ്ക്, കൊടകര കര്‍ഷക തൊഴിലാളി സഹകരണ സംഘം എന്നിവ സഹകരണ മേഖലയിലെ സ്ഥാപനങ്ങളാണ്. ഒട്ടേറെ സ്വകാര്യ ബാങ്കുകളാണ് ഇപ്പോൾ കൊടകരയിൽ പ്രവർത്തിക്കുന്നത്. ധനലക്ഷ്മി, സൌത്ത് ഇന്ത്യന്‍ ബാങ്ക്, സ്റ്റേറ്റ് ബാങ്ക് ഓഫ് ഇന്ത്യ ,സ്റ്റേറ്റ് ബാങ്ക് ഓഫ് ട്രവാൻകൂർ, എച്.ഡി.എഫ്.സി ബാങ്ക് , കാത്തോലിക് സിരിയൻ ബാങ്ക്, ഇരിഞ്ഞാലക്കുട ടൌണ്‍ കോ- ഒപെരേട്ടീവ് ബാങ്ക്, സെൻട്രൽ ബാങ്ക് , കാനറ ബാങ്ക് എന്നിവയുടെ ഓരോ ശാഖകളും പഞ്ചായത്തില്‍ പ്രവര്‍ത്തിച്ചുവരുന്നു. കൊടകര പഞ്ചായത്ത് കമ്മ്യൂണിറ്റിഹാള്‍,പുലിപ്പാറകുന്ന് കമ്മ്യൂണിറ്റിഹാള്‍ എന്നിവയും ഒരു സ്വകാര്യ കല്യാണമണ്ഡപവും പഞ്ചായത്തില്‍ സ്ഥിതി ചെയ്യുന്നു. വൈദ്യുതി ബോര്‍ഡിന്റെ ഓഫീസ്, വില്ലേജ് ഓഫീസ്, ടെലഫോണ്‍ എക്സ്ചേഞ്ച് എന്നിവ കൊടകരയില്‍ നിലകൊള്ളുന്നു. കൊടകരയില്‍ പ്രവര്‍ത്തിച്ചുവരുന്ന കൃഷിഭവന്‍, മൈനര്‍ ഇറിഗേഷന്‍, ട്രസ്റ്റ് ചെക്ക് പോസ്റ്റ് എന്നിവ പഞ്ചായത്തില്‍ പ്രവര്‍ത്തിക്കുന്ന സംസ്ഥാന സര്‍ക്കാര്‍ സ്ഥാപനങ്ങളാണ്. കൊടകര പോലീസ് സ്റ്റേഷന്‍ പെരിങ്ങകുളം എന്ന സ്ഥലത്തിനടുത്താണ് സ്ഥിതി ചെയ്യുന്നത്. അപ്പോളോ ടയേഴ്സ് ആണ് പ്രധാന സ്വകാര്യ സ്ഥാപനം. 4 തപാല്‍ ഓഫീസുകള്‍ പഞ്ചായത്തിന്റെ അങ്ങിങ്ങായി സ്ഥിതിചെയ്യുന്നു.
ഗതാഗതരംഗം
ദേശീയപാത 47-ന്റെ ആറുകിലോമീറ്റര്‍ പഞ്ചായത്തില്‍ കൂടികടന്നുപോകുന്നു. 84 കി.മി ദൈര്‍ഘ്യം വരുന്ന പഞ്ചായത്തു റോഡുകള്‍ യാത്രാസൌകര്യം ലഭ്യമാക്കുന്നുണ്ടെങ്കിലും പഞ്ചായത്തിന്റെ വികസനപദ്ധതികള്‍ക്ക് കൂടുതല്‍ ഗതാഗത സൌകര്യങ്ങള്‍ ആവശ്യമായിവരുന്നു. വിദേശയാത്രകള്‍ക്കായി പഞ്ചായത്തു നിവാസികള്‍ ആശ്രയിക്കുന്നത് ഏറ്റവും അടുത്തുള്ള വിമാനത്താവളമായ നെടുമ്പാശ്ശേരി വിമാനത്താവളത്തെയാണ്. കല്ലേറ്റുംകര റെയില്‍വേ സ്റ്റേഷനാണ് പഞ്ചായത്തിന്റെ ഏറ്റവും അടുത്ത റെയില്‍വേ സ്റ്റേഷന്‍. തുറമുഖം എന്നനിലയില്‍ കൊച്ചിതുറമുഖമാണ് പഞ്ചായത്തിനോട് ഏറ്റവും അടുത്തുള്ളത്. കൊടകര ബസ് സ്റ്റാന്റ് ആണ് പഞ്ചായത്തിന്റെ റോഡുഗതാഗതം കേന്ദ്രീകരിച്ചിരിക്കുന്ന ഒരു സ്ഥലം. ഗതാഗത മേഖലയിലെ പുരോഗതി വിളിച്ചറിയിക്കുന്ന ചിഹ്നങ്ങളാണ് ഇവിടുത്തെ പാലങ്ങള്‍, കൊടകര മേല്‍പാലം ഉള്‍പ്പെടെ ഏട്ടുപാലങ്ങള്‍ പഞ്ചായത്തിന്റെ റോഡുകളെ തമ്മില്‍ ബന്ധിപ്പിച്ചു കൊണ്ട് നിലകൊള്ളുന്നു.
വാണിജ്യരംഗം
പഞ്ചായത്തിലെ പ്രധാനപ്പെട്ട വ്യാപാരകേന്ദ്രങ്ങളാണ് കൊടകര, പേരാമ്പ്ര എന്നീ സ്ഥലങ്ങള്‍. കൊടകരയില്‍ സ്ഥിതി ചെയ്യുന്ന പഞ്ചായത്ത് ഓഫീസ് ഷോപ്പിംഗ് കോപ്ളക്സ് ഉള്‍പ്പെടെ രണ്ടു ഷോപ്പിംഗ് കോംപ്ളക്സുകള്‍ പഞ്ചായത്തില്‍ നിലവിലുണ്ട്. കൊടകരയില്‍ ഒരു മാര്‍ക്കറ്റും പ്രവര്‍ത്തിക്കുന്നുണ്ട്. നിരവധി ഷോപ്പിംഗ് കോപ്ളക്സ് ഇപ്പോൾ അങ്ങിങ്ങായി ഉയർന്നു കൊണ്ടിരിക്കുന്നു.
സാംസ്കാരികരംഗം
നിരവധി ആരാധനാലയങ്ങള്‍ ഈ പഞ്ചായത്തില്‍ ഉണ്ട്. കരുപ്പാകുളങ്ങര, കണ്ടംകുളങ്ങര, മനക്കുളങ്ങര തുടങ്ങിയ സ്ഥലങ്ങളിലെ ക്ഷേത്രങ്ങളും തേശ്ശേരി പള്ളി, ദേവമാതാപള്ളി, കൊടകര സെന്റ് ജോസഫ് തുടങ്ങിയ ക്രിസ്ത്യന്‍ പള്ളികളും ഹനഫി ജുമാമസ്ജിദും പഞ്ചായത്തിലെ പ്രധാന ആരാധനാലയങ്ങളാണ്. ഈ ആരാധനാലയങ്ങളുമായി ബന്ധപ്പെട്ടുനടക്കുന്ന ഉത്സവം, പള്ളിപെരുന്നാള്‍, തിരുനാള്‍ എന്നീ വിവിധ ആഘോഷ പരിപാടികള്‍ പഞ്ചായത്തിന്റെ സാംസ്കാരിക തനിമ വിളിച്ചോതുന്നവയാണ്. നാടകരംഗത്ത് പ്രസിദ്ധിയാര്‍ജ്ജിച്ച കൊടകര മാധവന്‍, സാഹിത്യനിരൂപകനായ എം.എസ്.മേനോന്‍, പത്രാധിപര്‍ ആയിരുന്ന ഡോ.വി.കൃഷ്ണവാര്യര്‍ എന്നിവര്‍ ഈ പഞ്ചായത്തിന്റെ മണ്‍മറഞ്ഞുപോയ സവിശേഷ വ്യക്തിത്വങ്ങളാണ്. സിനിമാതാരമായ കെ.ആര്‍.വിജയ, ഹരിജന മുന്നറ്റത്തിനായി പ്രവര്‍ത്തിച്ച പി.പി.കുഞ്ഞിപ്പേങ്ങന്‍, പി.സി. വേലായുധന്‍, സി.പി.കണ്ണന്‍ എന്നിവരും ഈ പഞ്ചായത്തില്‍ ഇന്നു ജീവിച്ചിരിക്കുന്നവരില്‍ പ്രമുഖരാണ്. കലാവേദി, രഞ്ജിനി തീയേറ്റേഴ്സ്, സഹൃദയവേദി തുടങ്ങിയ ക്ളബുകള്‍ കലാരംഗത്തും, അമേച്വര്‍ ഫുട്ബോള്‍ അസോസിയേഷന്‍, വിക്ടറിക്ളബ്, യങ്ങസ്റ്റേര്‍സ് ക്രിക്കറ്റ് ക്ളബ് എന്നിവ കായികരംഗത്തും സമഗ്രമായ സംഭാവനകള്‍ നല്‍കിവരുന്നു. അഴകം,വല്ലപ്പടി, കാവുന്തറ, മൈത്രിനഗര്‍, വട്ടേക്കാട്, പുലിപ്പാറകുന്ന്, മനക്കുളങ്ങര ഗാന്ധിനഗര്‍ എന്നിവിടങ്ങളിലായി എട്ടു സാംസ്കാരിക സ്ഥാപനങ്ങളും പഞ്ചായത്തില്‍ സ്ഥിതി ചെയ്യുന്നു. പഞ്ചായത്തുവായനശാല ഉള്‍പ്പെടെ ഏഴുവായനശാലകള്‍ പഞ്ചായത്തിന്റെ അങ്ങിങ്ങായി പ്രവര്‍ത്തിച്ചുവരുന്നു.
ആരോഗ്യരംഗം
ആരോഗ്യപരിപാലനരംഗത്ത് സജീവമായി പ്രവര്‍ത്തിക്കുന്ന വിവിധ ആരോഗ്യകേന്ദ്രങ്ങള്‍ പഞ്ചായത്തിനകത്തുണ്ട്. അലോപ്പതി മേഖലയില്‍ ആറു സ്വകാര്യ ആശുപത്രികള്‍ നിലവിലുണ്ട്. സര്‍ക്കാര്‍ ആയുര്‍വേദ ആശുപത്രി, കൊടകര പി.എച്ച്.സി, ഹോമിയോ ആശുപത്രി കനകമാല എന്നിവ പ്രാഥമിക ചികിത്സാ സൌകര്യങ്ങള്‍ ലഭ്യമാക്കുന്ന കേന്ദ്രങ്ങളാണ്. പ്രാഥമിക ഉപകേന്ദ്രങ്ങളുടെ 4 സബ് സെന്ററുകള്‍ തേശ്ശേരി, കനകമാല, കാരൂര്‍, വട്ടേക്കാട് എന്നിവിടങ്ങളില്‍ സ്ഥിതി ചെയ്യുന്നു. ആയുര്‍വേദം, ഹോമിയോപ്പതി എന്നീ മേഖലകളില്‍ പ്രവര്‍ത്തിക്കുന്ന രണ്ട് സ്വകാര്യ ആശുപത്രികള്‍ പഞ്ചായത്തില്‍ പ്രവര്‍ത്തിച്ചുവരുന്നു.
