കൊടകര : നാട്ടുചരിത്രങ്ങളെ അക്ഷരങ്ങളിലേയ്ക്ക് ആവാഹിച്ച് കോടാലി സ്വദേശിയായ നാരായണപിഷാരടി. മൂന്നുപതിറ്റാണ്ടുകാലം റവന്യൂ വകുപ്പിലെ സേവനത്തിന് ശേഷം വിരമിച്ച പിഷാരടി കൊറോണ മഹാമാരി നടമാടുന്ന ഈ ദുരിതനാളുകള്‍ക്കിടയില്‍ മൂന്ന് പുസ്തകങ്ങളാണ് രചിച്ചത്.എന്റെ സ്വത്വാന്വേഷണ കഥകള്‍, പോക്കറ്റില്‍ ഒതുങ്ങുന്ന ഇന്ത്യാചരിത്രം (തമിഴ് പരിഭാഷ), കേരളത്തിന്റെ സ്ഥലചരിത്രകോശം ഇവയാണ് എം. പി. എന്‍ പിഷാരടിയുടെ പുതു കൃതികള്‍. ശ്രവണമതവും അമ്പലവാസികളും ക്ഷേത്രോത്സവങ്ങളും അനുഷ്ഠാനകലകളുമൊക്കെയായി കേരളസംസ്‌കൃതിയെ ആഴത്തില്‍ സ്പര്‍ശിക്കുന്ന പതിനഞ്ചാമത്തെ കൃതിയായ എന്റെ സ്വത്വാന്യോഷണ കഥകളുടെ പ്രകാശനം പിഷാരടിയുടെ കോടാലിയിലെ വസതിയില്‍നടന്നു.
ചില സ്വത്വാന്യോഷണങ്ങള്‍, മുത്തുപ്പട്ടണവും മാണിക്യപട്ടണഴും, പൂരാഘോഷങ്ങളുടെ ശ്രവണപ്പഴമ, രംഗങ്ങളും ബന്ധങ്ങളും, അനുഷ്ഠാനകലകള്‍, മറ്റത്തൂരിലെ മഹാഭാരതം, സ്തലനാമസൂചികകള്‍, പ്രളയം , തൃശൂര്‍ കേരളത്തിന്റെ സാംസ്‌കാരിക തലസ്ഥാനമായതിന്റെ നാള്‍വഴികള്‍ എന്നിവയാണ് ഇതിലൂടെ പിഷാരടി വരച്ചിടുന്നത്. കൊടകര കാവില്‍ പിഷാരത്ത് കൃഷ്ണപിഷാരടിയുടേും കോടാലി മാങ്കുറ്റിപ്പാടം പിഷാരത്ത്് നാനിക്കുട്ടി പിഷാരസ്യാരുടേയും മകനായി 1940 ലാണ് പിഷാരടിയുടെ ജനനം. കോടാലിയിലും മൂന്നുമുറിയിലും കൊടകരയിലുമായിരുന്നു സ്‌കൂള്‍ വിദ്യാഭ്യാസം. വിദ്യാര്ഥിയായിരിക്കുമ്പോള്
പ്രസംഗം ,ലേഖനം,സാഹിത്യവിമമര്‍ശനങ്ങള്‍ എന്നിവയായിരുന്നു വിഷയം. തുടര്‍ന്ന് ലാന്റ്് റവന്യൂ കോഴ്‌സ് പാസ്സായി. വ്യാഴവട്ടക്കാലം കോടാലിയിലെ കെ..സി.സി.പി വായനശാലയുടെ അമരക്കാരനായിരുന്നു. റവന്യൂ വകുപ്പു ജീവനക്കാരനായി 1995 ല്‍ വിരമിച്ച ഇദ്ദേഹം സര്‍വീസ് സംഘടനകളിലും ഭാരവാഹിത്വം വഹിച്ചു. കോടാലിയിലെ ധര്‍മശാസ്താട്രസ്റ്റിന്‍രെ മുഖ്യസംഘാടകനായിരുന്നു. കൊടകര- ചാലക്കുടി എന്നീ മലയോരമേഖലയെ പറ്റിയുള്ള പഠനമാണ് ഇദ്ദേഹത്തിന്റെ ആദ്യ ഗ്രന്ഥം. കൂടാതെ ‘മുന്‍ കൊച്ചി രാജ്യത്തെ കേട്ടറിവുകള്‍’, തൃശൂര്‍ ജില്ലാ ഡയറക്ടറി, റവന്യൂ പൊതുഭരണത്തെ പ്രതിപാദിക്കുന്ന കഥ പറയുന്ന മണ്ണ്, എന്റെ ജീവിത ദര്‍ശനം, കന്യാകുമാരിമുതല്‍ ഗോകര്‍ണ്ണം വരെയുള്ള ക്ഷേത്രങ്ങളെ പരിചയപ്പെടുത്തുന്ന ‘മഹാക്ഷേത്രങ്ങളില്‍’ കൊടുങ്ങല്ലൂര്‍, ഇരിങ്ങാലക്കുട, ചാലക്കുടി എന്നീ നഗരാതിര്‍ത്ഥികളെ അപഗ്രഥിക്കുന്ന ‘മുകുന്ദപുരത്തെ മൂന്ന് പടിവാതിലുകള്‍’, മലയാളത്തിന്റെ രാഷ്ട്രീയ സാംസ്‌ക്കാരിക ചരിത്ര പഠനമായ ‘തിരഞ്ഞെടുത്ത ലേഖനങ്ങള്‍’ വൈദിക സാഹിത്യ കൃതിയായ ‘നാലമ്പലങ്ങളും ആറീശ്വരങ്ങളും’, മലയോരഗ്രാമമായ മറ്റത്തൂരിനെ വിവരിക്കുന്ന മറ്റത്തൂര്‍ ഡയറക്ടറി, കാലം ചെന്ന കച്ചങ്ങളും കക്ഷകങ്ങളും, എ.ഡി 1900 – 2011 വരെയുള്ള 101 വര്‍ഷത്തെ കേരള ചരിത്ര നിഘണ്ടു, ചാലക്കുടി ഡയറക്ടറി എന്നിങ്ങനെ ഇദ്ദേഹത്തിന്റെതായി ഒട്ടനവധി ഗ്രന്ഥങ്ങളാണുള്ളത്.
ആനുകാലികങ്ങളില്‍ പതിറ്റാണ്ടുകളായി നാട്ടറിവുകളും കലയും സംസ്‌ക്കാരവുമായി ബന്ധപ്പെട്ടും ഒട്ടനവധി ലേഖനങ്ങള്‍ എഴുതിയിട്ടുള്ള പിഷാരടി മറ്റത്തൂര്‍ പഞ്ചായത്തിലെ സാംസ്‌ക്കാരിക രംഗത്തും പൊതുപ്രവര്‍ത്തന രംഗത്തും സജീവമാണ്. വിശ്രമജീവിതത്തിനിടയിലും വാര്‍ദ്ധക്യ സഹജമായ വയ്യായ്മകള്‍ വകവെക്കാതെ കഥയും ചരിത്രാന്വേഷണവുമായി മലയോര ഗ്രാമമായ മറ്റത്തൂരിലെ സാംസ്‌ക്കാരിക വേദികളില്‍ നാരായണ പിഷാരടി എന്ന നാട്ടുകാരുടെ സ്വന്തം അനിയേട്ടന്‍ നിറസാന്നിദ്ധ്യമാണ്.
നാരായണപിഷാരടിയുടെ പതിനഞ്ചാമത്തെ പുസ്തകത്തിന്റെ പ്രകാശനം മറ്റത്തൂര്‍ ഗ്രാമപഞ്ചായത്ത്് വൈസ്പ്രസിഡണ്ട് കെ.വി.ഉണ്ണികൃഷ്ണന്‍ മാധ്യമപ്രവര്‍ത്തകന്‍ പുന്നക്കല്‍ നാരായണു നല്‍കി നിര്‍വഹിച്ചു. ഗ്രാമപഞ്ചായത്ത് പ്രസിഡണ്ട് അശ്വതിവിബി യോഗം ഉദ്ഘാടനം ചെയ്തു. കെ.പ്രസാദ് പുസ്തകം പരിചയപ്പെടുത്തി. പഞ്ചായത്തംഗങ്ങളായ കെ.ആര്‍.ഔസേപ്പ്, ഹിതേഷ് കാരണത്ത്, റിട്ട.അധ്യാപകന്‍ ഐ.ആര്‍.ബാലകൃഷ്ണന്‍, ഡോ.രാജന്‍ പിഷാരടി, സുരേഷ് പി അരിക്കാട്ട് എന്നിവര്‍ പ്രസംഗിച്ചു.
കൊടകര ഉണ്ണി
